गजेन्द्र ठाकुर- मैथिलीक भिखारी ठाकुरक नामसँ प्रसिद्ध मैथिलीक पहिल जनकवि रामदेव प्रसाद मण्‍डल ‘झारूदार’क गीत आ झारू - “हमरा बि‍नु जगत सुन्ना छै”

 𑒑𑒖𑒹𑒢𑓂𑒠𑓂𑒩 𑒚𑒰𑒏𑒳𑒩- 𑒧𑒻𑒟𑒱𑒪𑒲𑒏 𑒦𑒱𑒐𑒰𑒩𑒲 𑒚𑒰𑒏𑒳𑒩𑒏 𑒢𑒰𑒧𑒮𑒿 𑒣𑓂𑒩𑒮𑒱𑒠𑓂𑒡 𑒧𑒻𑒟𑒱𑒪𑒲𑒏 𑒣𑒯𑒱𑒪 𑒖𑒢𑒏𑒫𑒱 𑒩𑒰𑒧𑒠𑒹𑒫 𑒣𑓂𑒩𑒮𑒰𑒠 𑒧𑒝𑓂𑒛𑒪 ‘𑒗𑒰𑒩𑒴𑒠𑒰𑒩’𑒏 𑒑𑒲𑒞 𑒂 𑒗𑒰𑒩𑒴 - “𑒯𑒧𑒩𑒰 𑒥𑒱𑒢𑒳 𑒖𑒑𑒞 𑒮𑒳𑒢𑓂𑒢𑒰 𑒕𑒻”

𑒧𑒻𑒟𑒱𑒪𑒲𑒏 𑒦𑒱𑒐𑒰𑒩𑒲 𑒚𑒰𑒏𑒳𑒩 “𑒩𑒰𑒧𑒠𑒹𑒫 𑒣𑓂𑒩𑒮𑒰𑒠 𑒧𑒝𑓂𑒛𑒪 "𑒗𑒰𑒩𑒴𑒠𑒰𑒩" ” 𑒠𑒃 𑒕𑒟𑒱 𑒧𑒰𑒙𑒱 𑒂 𑒏𑒯𑒻 𑒕𑒟𑒱 “𑒯𑒧𑒩𑒰 𑒥𑒱𑒢𑒳 𑒖𑒑𑒞 𑒮𑒳𑒢𑓂𑒢𑒰 𑒕𑒻”।
𑒧𑒻𑒟𑒱𑒪𑒲 𑒮𑒰𑒯𑒱𑒞𑓂𑒨 𑒫𑒰 𑒏𑒼𑒢𑒼 𑒦𑒰𑒭𑒰𑒏 𑒮𑒰𑒯𑒱𑒞𑓂𑒨𑒧𑒹 𑒗𑒰𑒩𑒴 𑒢𑒰𑒧𑒏 𑒏𑒰𑒫𑓂𑒨 𑒫𑒱𑒡𑒰 𑒮𑒳𑒢𑒢𑒹 𑒩𑒯𑒱𑒌? 𑒩𑒰𑒧𑒠𑒹𑒫 𑒣𑓂𑒩𑒮𑒰𑒠 𑒧𑒝𑓂𑒛𑒪 “𑒗𑒰𑒩𑒴𑒠𑒰𑒩” 𑒖𑒲𑒏 𑒗𑒰𑒩𑒴𑒏𑒹𑒿 𑒕𑒼𑒛𑓃𑒱 𑒏𑓄? 𑒢𑒻 𑒢𑒹!
𑒏𑒰𑒩𑒝 𑒩𑒰𑒧𑒠𑒹𑒫 𑒣𑓂𑒩𑒮𑒰𑒠 𑒧𑒝𑓂𑒛𑒱𑒪 “𑒗𑒰𑒩𑒴𑒠𑒰𑒩” 𑒧𑒯𑒲𑒮𑒏 𑒣𑒲𑒚, 𑒐𑒹𑒞𑒏 𑒂𑒛𑓃𑒱-𑒡𑒴𑒩 𑒂 𑒩𑒮𑓂𑒞𑒰 𑒔𑒾𑒥𑒙𑒱𑒨𑒰𑒣𑒩 𑒮𑓂𑒫𑒞𑓁 𑒮𑓂𑒤𑒴𑒩𑓂𑒞 𑒖𑒹 𑒢𑒫 𑒫𑒱𑒡𑒰𑒏 𑒂𑒫𑒱𑒭𑓂𑒏𑒰𑒩 𑒏𑒹𑒢𑒹 𑒕𑒟𑒱 𑒮𑒹 𑒮𑒧𑒰𑒖𑒏 𑒠𑒳𑒩𑓂𑒑𑒳𑒝𑒏𑒹𑒿 𑒐𑒩𑒛𑓃𑒰𑒮𑒿 𑒐𑒩𑒛𑓃𑒥𑒰 𑒪𑒹𑒪 𑒕𑒻। 𑒤𑒳𑒪𑒗𑒰𑒛𑓃𑒴𑒮𑒿 𑒐𑒩𑒱𑒯𑒰𑒢 𑒢𑒻 𑒥𑒯𑒰𑒩𑒪 𑒯𑒋𑒞, 𑒂 𑒐𑒩𑒛𑓃𑒰 𑒮𑒿 𑒍𑒮𑒰𑒩𑒰 𑒢𑒻 𑒥𑒯𑒰𑒩𑒱 𑒮𑒏𑒻 𑒕𑒲। 𑒪𑒰𑒚𑒲𑒧𑒹 𑒩𑒰𑒯𑒛𑓃𑒱𑒏 𑒛𑒰𑒿𑒙𑒏 𑒗𑒰𑒩𑒴𑒮𑒿 𑒗𑒼𑒪-𑒗𑒰𑒪 𑒮𑒰𑒤 𑒏𑒋𑒪 𑒖𑒰𑒃𑒋। 𑒮𑒹 𑒞𑒩𑒯-𑒞𑒩𑒯𑒏 𑒥𑒰𑒜𑓃𑒢𑒱, 𑒂 𑒐𑒩𑒛𑓃𑒰𑒏 𑒣𑓂𑒩𑒔𑒪𑒢 𑒁𑒕𑒱। 𑒩𑒰𑒧𑒠𑒹𑒫 𑒖𑒲 𑒑𑒲𑒞 𑒮𑒹𑒯𑒼 𑒪𑒱𑒐𑒻 𑒕𑒟𑒱, 𑒂 𑒣𑒢𑒱𑒮𑒼𑒐𑒰 𑒮𑒢 𑒩𑓀𑒑 𑒥𑒱𑒩𑓀𑒑𑒏 𑒗𑒰𑒩𑒴 𑒮𑒹𑒯𑒼। 𑒖𑒹𑒯𑒹𑒢 𑒮𑒧𑒮𑓂𑒨𑒰 𑒞𑒹𑒯𑒢𑒹 𑒗𑒰𑒩𑒴। 𑒂 𑒧𑒻𑒟𑒱𑒪𑒲𑒧𑒹 𑒖𑒐𑒢 𑒑𑒼𑒞𑓂𑒩-𑒧𑒴𑒪𑒏 𑒅𑒣𑒢𑒰𑒧 𑒩𑒐𑒥𑒰𑒏 𑒣𑓂𑒩𑒫𑒵𑒞𑓂𑒞𑒱 𑒏𑒱𑒕𑒳 𑒢𑒫 𑒂 𑒣𑒳𑒩𑒰𑒢 𑒪𑒹𑒐𑒏𑒧𑒹 𑒠𑒹𑒐𑒪 𑒖𑒰 𑒩𑒯𑒪 𑒁𑒕𑒱 𑒞𑒐𑒢 𑒄 “𑒗𑒰𑒩𑒴𑒠𑒰𑒩” 𑒅𑒣𑒢𑒰𑒧 𑒏𑒲 𑒮𑒦 𑒔𑒲𑒖 𑒥𑒱𑒢𑒳 𑒏𑒯𑒢𑒹 𑒏𑒯𑒱 𑒖𑒰𑒃𑒋?
𑒂 𑒏𑒫𑒱𑒏 𑒂𑒞𑓂𑒧𑒫𑒱𑒬𑓂𑒫𑒰𑒮, 𑒯𑒧 𑒢𑒻 𑒞𑒿 𑒏𑒱𑒕𑒳 𑒢𑒻।
𑒯𑒧𑒩𑒰𑒮𑒿 𑒣𑒯𑒱𑒪𑒹 𑒏𑒼𑒢𑒼 𑒢𑒻 𑒬𑒰𑒮𑒢।
𑒢𑒻 𑒕𑒻 𑒏𑒼𑒢𑒼 𑒡𑒩𑓂𑒧𑒏 𑒫𑒱𑒡𑒰𑒢॥
𑒯𑒧𑒩𑒰 𑒥𑒱𑒢𑒳 𑒖𑒑𑒞 𑒮𑒳𑒢𑓂𑒢𑒰 𑒕𑒻।
𑒯𑒞𑒻𑒥𑒪𑒰 𑒕𑒻 𑒣𑒬𑒳 𑒮𑒧𑒰𑒢॥
𑒂𑒥 𑒞𑒰𑒏𑒱 𑒪𑒱𑒁 𑒌 𑒗𑒰𑒩𑒴𑒧𑒹 𑒥𑒾𑒠𑓂𑒡 𑒠𑒩𑓂𑒬𑒢𑒏 𑒬𑒴𑒢𑓂𑒨𑒫𑒰𑒠 𑒂 𑒬𑓀𑒏𑒩𑒏 𑒁𑒠𑓂𑒫𑒻𑒞 𑒠𑒩𑓂𑒬𑒢!
𑒯𑒳𑒢𑒏𑒰 𑒣𑒻𑒮𑒰𑒏 𑒩𑒼𑒑 𑒢𑒻 𑒔𑒰𑒯𑒲 𑒞𑒿 𑒁𑓀𑒡𑓂𑒫𑒱𑒬𑓂𑒫𑒰𑒮𑒏 𑒩𑒼𑒑 𑒮𑒹𑒯𑒼 𑒢𑒻।
𑒮𑒦 𑒥𑒢𑒪 𑒕𑒻 𑒣𑒻𑒮𑒰 𑒩𑒼𑒑𑒲,
𑒁𑒢𑓂𑒡𑒢𑒫𑒱𑒬𑓂𑒫𑒰𑒮, 𑒏𑒳𑒩𑒲𑒞𑒏 𑒖𑒼𑒑𑒲
𑒧𑒳𑒠𑒰 𑒌 𑒪𑒹𑒪 𑒩𑒰𑒧𑒏 𑒞𑒲𑒩 𑒏𑒧𑒰𑒢 𑒔𑒰𑒯𑒲 𑒏𑒲? 𑒏𑒰𑒩𑒝 𑒞𑒃 𑒪𑒹𑒪 𑒞𑒿 𑒩𑒰𑒧𑒏 𑒁𑒫𑒞𑒰𑒩𑒏 𑒣𑓂𑒩𑒞𑒲𑒏𑓂𑒭𑒰 𑒏𑒩𑒋 𑒣𑒛𑓃𑒞। 𑒢𑒻, 𑒮𑓂𑒫𑒨𑓀𑒣𑒩 𑒏𑒩𑒴 𑒫𑒱𑒬𑓂𑒫𑒰𑒮, 𑒏𑒰𑒩𑒝 𑒖𑒿 𑒮𑒧𑒮𑓂𑒨𑒰 𑒁𑒯𑒰𑒿 𑒕𑒲 𑒞𑒿 𑒮𑒧𑒰𑒡𑒰𑒢 𑒮𑒹𑒯𑒼 𑒁𑒯𑒲𑓀।
𑒁𑒯𑒰𑒿 𑒥𑒱𑒢𑒰 𑒏𑒹 𑒄 𑒠𑒳𑒐 𑒯𑒩𑒞𑒻
𑒁𑒯𑒲𑓀𑒮𑒿 𑒄 𑒮𑒦 𑒠𑒰𑒢𑒫 𑒧𑒩𑒞𑒻
𑒏𑒪𑒧𑒏𑒹𑒿 𑒋𑒏 𑒥𑒹𑒩 𑒤𑒹𑒩 𑒥𑒢𑒰𑒥𑒴
𑒩𑒰𑒧𑒏 𑒞𑒲𑒩 𑒏𑒧𑒰𑒢 𑒨𑒾।

𑒂𑒣𑒮𑒲 𑒋𑒏𑒞𑒰𑒏 𑒧𑒯𑒞𑓂𑒫 𑒏𑒫𑒱 𑒢𑒲𑒏 𑒖𑒹𑒏𑒰𑒿 𑒥𑒳𑒗𑒻 𑒕𑒟𑒱, 𑒧𑒳𑒠𑒰 𑒋𑒏𑒞𑒰 𑒏𑒼𑒢𑒰 𑒂𑒍𑒞, 𑒞𑒏𑒩 𑒮𑒧𑒰𑒡𑒰𑒢 𑒠𑒹𑒐𑒴:
𑒋𑒏𑒞𑒰 𑒥𑒢𑒻𑒪𑒹 𑒮𑒯𑒋 𑒣𑒛𑓃𑒻 𑒕𑒻
𑒒𑒙𑒼 𑒪𑒑𑒰 𑒏𑓄 𑒥𑒯𑒋 𑒣𑒛𑓃𑒻 𑒕𑒻
𑒁𑒣𑒢 𑒑𑒪𑒞𑒣𑒩 𑒪𑒯𑒋 𑒣𑒛𑓃𑒻 𑒕𑒻।
𑒢𑒰𑒩𑒲𑒏 𑒮𑓂𑒟𑒱𑒞𑒱, 𑒮𑒹 𑒍 𑒢𑒰𑒩𑒲 𑒑𑒰𑒧𑒏 𑒯𑒼𑒟𑒱 𑒫𑒰 𑒍 𑒢𑒹𑒞𑒰 𑒢𑒹 𑒏𑒱𑒋 𑒥𑒢𑒱 𑒑𑒹𑒪 𑒯𑒼𑒟𑒱, 𑒁𑒐𑒢𑒼 𑒙𑒲𑒮 𑒅𑒚𑒥𑒻𑒞 𑒁𑒕𑒱, 𑒂 𑒏𑒫𑒱 𑒖𑒿 𑒗𑒰𑒩𑒴𑒠𑒰𑒩 𑒯𑒼𑒟𑒱 𑒞𑒿 𑒍𑒃 𑒙𑒲𑒮𑒏 𑒫𑒩𑓂𑒝 𑒋𑒢𑒰 𑒯𑒼𑒃𑒞 𑒁𑒕𑒱:
𑒢𑒰𑒩𑒲 𑒮𑒲𑒞𑒰 𑒩𑒰𑒡𑒰 𑒁𑓀𑒬,
𑒣𑒳𑒩𑒴𑒭 𑒥𑒢𑒪 𑒕𑒻 𑒩𑒰𑒫𑒝 𑒏𑓀𑒬।
𑒤𑒹𑒩 𑒏𑒼𑒢𑒰 𑒏𑓄 𑒔𑒪𑒞𑒻,
𑒄 𑒒𑒩 𑒠𑒳𑒢𑒱𑒨𑒰𑒿𑒠𑒰𑒩𑒲 𑒨𑒾।

𑒧𑒳𑒠𑒰 𑒞𑒏𑒩 𑒅𑒣𑒰𑒨, 𑒏𑒲 𑒣𑒳𑒩𑒳𑒭 𑒥𑒠𑒪𑒞 𑒢𑒰𑒩𑒲𑒏 𑒠𑒬𑒰? 𑒢𑒻, 𑒄 𑒂𑒞𑓂𑒧𑒫𑒱𑒬𑓂𑒫𑒰𑒮 𑒮𑓂𑒫𑒨𑓀 𑒢𑒰𑒩𑒲𑒧𑒹 𑒕𑒢𑓂𑒯𑒱, 𑒍 𑒬𑒱𑒏𑓂𑒭𑒰𑒏 𑒛𑒼𑒩 𑒣𑒏𑒛𑓃𑒞𑒲 𑒂…
𑒂𑒥 𑒢𑒻 𑒢𑒰𑒩𑒲 𑒩𑒯𑒥 𑒁𑒢𑒰𑒩𑒲,
𑒥𑒢𑒥𑒻 𑒮𑒐𑓂𑒞 𑒏𑒚𑒼𑒩 𑒨𑒾।
𑒞𑒿 𑒏𑒲 𑒫𑒋𑒯 𑒢𑒰𑒩𑒲 𑒫𑒰 𑒖𑒰𑒞𑒱-𑒣𑒰𑒞𑒱 𑒂𑒠𑒱𑒏 𑒮𑒧𑒮𑓂𑒨𑒰 𑒙𑒰 𑒣𑒩 𑒡𑓂𑒨𑒰𑒢 𑒕𑒢𑓂𑒯𑒱 𑒏𑒫𑒱𑒏? 𑒢𑒻, 𑒍 𑒣𑓂𑒩𑒠𑒴𑒭𑒝 𑒮𑒢 𑒫𑒱𑒖𑓂𑒘𑒰𑒢𑒏 𑒠𑒹𑒢𑒣𑒩 𑒮𑒹𑒯𑒼 𑒔𑒱𑒢𑓂𑒞𑒱𑒞 𑒕𑒟𑒱:
𑒫𑒱𑒖𑓂𑒘𑒰𑒢𑒏 𑒄 𑒠𑒹𑒢 𑒣𑓂𑒩𑒠𑒴𑒭𑒝
𑒥𑒢𑒱 𑒒𑒩 𑒒𑒳𑒮𑒪 𑒔𑒳𑒯𑒰𑒩 𑒨𑒾।
𑒥𑒰𑒒 𑒥𑒢𑒱 𑒄 𑒧𑒳𑒿𑒯 𑒥𑒾𑒢𑒹 𑒁𑒕𑒱
𑒠𑒳𑒱𑒢𑒨𑒰𑒿 𑒥𑒢𑒪 𑒮𑒱𑒏𑒰𑒩 𑒨𑒾

𑒂 𑒣𑓂𑒩𑒠𑒴𑒭𑒝 𑒏𑒼𑒢𑒰 𑒏𑒧 𑒯𑒋𑒞, 𑒮𑒹𑒯𑒼 𑒍 𑒢𑒫 𑒐𑒰𑒜𑓃𑒲𑒏𑒹𑒿 𑒩𑒰𑒯 𑒠𑒹𑒐𑒥𑒻 𑒕𑒟𑒱:
𑒃𑓀𑒖𑒢 𑒯𑒼 𑒣𑒴𑒩𑒰 𑒏𑓀𑒛𑒲𑒮𑒢
𑒡𑒳𑒂𑒿 𑒢𑒻 𑒕𑒼𑒛𑓃𑒻 𑒥𑒹𑒏𑒰𑒩 𑒨𑒾।
𑒏𑒩𑒴 𑒐𑒱𑒨𑒰𑒪 𑒏𑒱𑒕𑒳 𑒁𑒑𑒱𑒪𑒰 𑒣𑒱𑒜𑓃𑒲
𑒏𑒼𑒢𑒰 𑒩𑒔𑒞 𑒮𑓀𑒮𑒰𑒩 𑒨𑒾।
𑒂 𑒌 𑒣𑒩 𑒯𑒳𑒢𑒏𑒩 𑒋𑒏𑒙𑒰 𑒗𑒰𑒩𑒴 𑒮𑒹𑒯𑒼 𑒕𑒢𑓂𑒯𑒱, 𑒍 𑒫𑒢𑒹 𑒙𑒰 𑒢𑒻 𑒫𑒢𑒫𑒰𑒮𑒲𑒏 𑒮𑒹𑒯𑒼 𑒮𑓀𑒩𑒏𑓂𑒭𑒝 𑒔𑒰𑒯𑒻 𑒕𑒟𑒱:
𑒫𑒢 𑒗𑒲𑒪 𑒢𑒠𑒲 𑒂 𑒫𑒢𑒫𑒰𑒮𑒲
𑒣𑒯𑒰𑒩 𑒣𑒚𑒰𑒩 𑒮𑓀𑒑 𑒩𑒹𑒑𑒱𑒮𑓂𑒞𑒰𑒢।
𑒏𑒩𑒴 𑒮𑒳𑒩𑒏𑓂𑒭𑒰 𑒣𑒩𑓂𑒨𑒰𑒫𑒩𑒝 𑒏𑒹𑒩
𑒌 𑒮𑒿 𑒠𑒹𑒬 𑒥𑒢𑒞 𑒡𑒢𑒫𑒰𑒢॥

𑒠𑒯𑒹𑒖 𑒂 𑒏𑒰𑒙𑒩 𑒣𑓂𑒩𑒟𑒰𑒣𑒩 𑒩𑒰𑒧𑒠𑒹𑒫 𑒖𑒲 𑒪𑒱𑒐𑒻 𑒕𑒟𑒱:
𑒂𑒃 𑒯𑒩 𑒒𑒩𑒧𑒹 𑒮𑒲𑒞𑒰 𑒩𑒼𑒌 𑒕𑒻
𑒩𑒰𑒃𑒞-𑒩𑒰𑒃𑒞 𑒦𑒩𑒱 𑒢𑒻 𑒖𑒢𑒏 𑒮𑒳𑒞𑒻 𑒕𑒻
𑒏𑒞𑒋 𑒮𑒿 𑒋𑒞𑒻 𑒠𑒯𑒹𑒖𑒏 𑒣𑒻𑒮𑒰
𑒯𑒹𑒞𑒻 𑒏𑒹𑒢𑒰 𑒏𑒢𑓂𑒨𑒰𑒠𑒰𑒢 𑒨𑒾

𑒧𑒱𑒟𑒱𑒪𑒰𑒣𑒩 𑒗𑒰𑒩𑒴𑒠𑒰𑒩𑒏𑒹𑒿 𑒑𑒩𑓂𑒫 𑒕𑒢𑓂𑒯𑒱, 𑒏𑒼𑒢 𑒧𑒱𑒟𑒱𑒪𑒰𑒣𑒩:
𑒖𑒑𑒞𑒩𑒢𑒲 𑒖𑒞𑒋 𑒑𑓀𑒑𑒰 𑒡𑒰𑒩𑒰, 𑒖𑓂𑒨𑒼𑒞𑒱 𑒪𑒱𑓀𑒑 𑒏𑒹𑒩 𑒖𑒞𑒋 𑒅𑒖𑓂𑒨𑒰𑒩𑒰।
𑒯𑒖𑒩𑒞 𑒞𑒳𑒪𑒮𑒲 𑒫𑒰𑒪𑓂𑒧𑒱𑒏𑒏 𑒑𑒳𑒿𑒖𑒱 𑒩𑒯𑒪 𑒅𑒣𑒠𑒹𑒬।

𑒧𑒳𑒠𑒰 𑒥𑒱𑒯𑒰𑒩 𑒁𑒢𑓂𑒞𑒩𑓂𑒑𑒞 𑒖𑒹 𑒧𑒱𑒟𑒱𑒪𑒰 𑒕𑒻 𑒞𑒏𑒩 𑒠𑒬𑒰𑒣𑒩 𑒗𑒰𑒩𑒴𑒠𑒰𑒩 𑒔𑒱𑒢𑓂𑒞𑒱𑒞 𑒕𑒟𑒱 𑒂 𑒥𑒱𑒯𑒰𑒩𑒏 𑒧𑒳𑒐𑓂𑒨𑒧𑓀𑒞𑓂𑒩𑒲 𑒢𑒲𑒞𑒱𑒬 𑒏𑒳𑒧𑒰𑒩, 𑒖𑒹 𑒫𑒱𑒏𑒰𑒮 𑒣𑒳𑒞 𑒏𑒯𑒪 𑒖𑒰𑒃 𑒕𑒟𑒱 𑒯𑒳𑒢𑒏𑒰 𑒗𑒰𑒩𑒴𑒠𑒰𑒩 𑒏𑒱𑒕𑒳 𑒠𑒹𑒐𑒥𑓄 𑒔𑒰𑒯𑒻 𑒕𑒟𑒱:
𑒏𑒹𑒧𑒩𑒰𑒮𑒿 𑒞𑒮𑓂𑒫𑒲𑒩 𑒥𑒢𑒹𑒥𑒻
𑒧𑒱𑒟𑒱𑒪𑒰 𑒧𑒻𑒟𑒱𑒪 𑒣𑒩𑒱𑒫𑒰𑒩 𑒏𑒹𑒩।
𑒞𑒏𑒩𑒰 𑒠𑒹𑒐𑒹𑒥𑒻 𑒣𑒙𑒢𑒰 𑒖𑒰 𑒏𑓄
𑒫𑒱𑒏𑒰𑒮 𑒣𑒳𑒞 𑒢𑒲𑒱𑒞𑒬 𑒏𑒳𑒧𑒰𑒩𑒏𑒹𑒿।
𑒤𑒼𑒙𑒼 𑒥𑒢𑒹𑒥𑒻 𑒐𑒹𑒞 𑒁𑒮𑒱𑓀𑒔𑒱𑒞
𑒮𑒱𑓀𑒔𑒰𑒃 𑒣𑒰𑒢𑒱 𑒫𑒱𑒖𑒪𑒲𑒮𑒿 𑒫𑓀𑒔𑒱𑒞।

𑒧𑒰𑒢𑒫𑒞𑒰 𑒏𑒏𑒩𑒰𑒧𑒹 𑒯𑒹𑒞𑒻, 𑒧𑒰𑒢𑒫𑒹 𑒧𑒹 𑒢𑒹। 𑒂 𑒞𑒏𑒩𑒹 𑒢𑒹 𑒦𑒹𑒙𑒞𑒻 𑒠𑒳𑒢𑒱𑒨𑒰𑒿𑒏 𑒞𑒰𑒖 𑒂 𑒮𑒋𑒯 𑒢𑒹 𑒖𑒲𑒞𑒻 𑒥𑒢𑒱 𑒗𑒰𑒩𑒴𑒠𑒰𑒩!

𑒞𑒰𑒖 𑒧𑒱𑒪𑒻 𑒮𑒧𑓂𑒣𑒴𑒩𑓂𑒝 𑒖𑒑𑒞𑒏
𑒂 𑒥𑒢𑒱 𑒖𑒲𑒥𑒋 𑒗𑒰𑒩𑒴𑒠𑒰𑒩
𑒧𑒰𑒢𑒫𑒧𑒹 𑒧𑒰𑒢𑒫𑒞𑒰 𑒯𑒼𑒃 𑒞𑒿
𑒥𑒠𑒪𑒻 𑒢𑒻 𑒍𑒏𑒩 𑒁𑒫𑒞𑒰𑒩

𑒞𑒿 𑒗𑒰𑒩𑒴 𑒂 𑒑𑒲𑒞, 𑒖𑒹 𑒥𑒼𑒢-𑒗𑒰𑒿𑒏𑒳𑒩𑒧𑒹 𑒐𑒹𑒞-𑒣𑒟𑒰𑒩𑒧𑒹 𑒒𑒳𑒧𑒻𑒞-𑒤𑒱𑒩𑒻𑒞 𑒪𑒱𑒐𑒰𑒋𑒪 𑒮𑒹 𑒞𑒿 𑒫𑒱𑒬𑒱𑒭𑓂𑒙 𑒯𑒹𑒥𑒹 𑒏𑒩𑒞𑒻 𑒂 𑒍𑒏𑒩 𑒪𑒱𑒐𑒻𑒥𑒪𑒰𑒏𑒹𑒿 𑒮𑒹 𑒞𑒰𑒖 𑒦𑒹𑒙𑒥𑒹 𑒏𑒩𑒞𑒻। 𑒧𑒱𑒟𑒱𑒪𑒰𑒏 𑒦𑒱𑒐𑒰𑒩𑒲 𑒚𑒰𑒏𑒳𑒩 𑒍𑒃 𑒞𑒰𑒖𑒏𑒹𑒿 𑒣𑒯𑒲𑒩𑒱 𑒗𑒰𑒩𑒴𑒠𑒰𑒩 𑒏𑒯𑒹𑒥𑒹 𑒏𑒩𑒞𑒻।