गजेन्द्र ठाकुर- मुन्नाजीक “माँझ आंगनमे कतिआएल छी”

 𑒑𑒖𑒹𑒢𑓂𑒠𑓂𑒩 𑒚𑒰𑒏𑒳𑒩- 𑒧𑒳𑒢𑓂𑒢𑒰𑒖𑒲𑒏 “𑒧𑒰𑒿𑒗 𑒂𑓀𑒑𑒢𑒧𑒹 𑒏𑒞𑒱𑒂𑒋𑒪 𑒕𑒲”

“𑒧𑒰𑒿𑒗 𑒂𑓀𑒑𑒢𑒧𑒹 𑒏𑒞𑒱𑒂𑒋𑒪 𑒕𑒲” 𑒧𑒳𑒢𑓂𑒢𑒰𑒖𑒲𑒏 𑒩𑒳𑒥𑒰𑒃 𑒂 𑒑𑒖𑒪 𑒮𑓀𑒑𑓂𑒩𑒯𑒏 𑒢𑒰𑒧 𑒁𑒕𑒱। 𑒏𑒞𑒱𑒂𑒋𑒪 𑒂 𑒮𑒹𑒯𑒼 𑒧𑒰𑒿𑒗 𑒂𑓀𑒑𑒢𑒧𑒹! 𑒏𑒲 𑒏𑒥𑒲𑒩𑒏 𑒅𑒪𑒙𑒥𑒰𑒮𑒲𑒏 𑒣𑓂𑒩𑒦𑒰𑒫 𑒁𑒕𑒱 𑒄 𑒂𑒏𑒱 𑒑𑒖𑒪𑒏 𑒮𑓂𑒫𑒦𑒰𑒫 𑒁𑒕𑒱 𑒄? 𑒢𑒯𑒱𑒨𑒹 𑒄 𑒏𑒥𑒲𑒩𑒏 𑒅𑒪𑒙𑒥𑒰𑒮𑒲𑒏 𑒣𑓂𑒩𑒦𑒰𑒫 𑒁𑒕𑒱 𑒢𑒯𑒱𑒨𑒹 𑒄 𑒑𑒖𑒪𑒏 𑒮𑓂𑒫𑒦𑒰𑒫 𑒁𑒕𑒱, 𑒄 𑒋𑒏𑒙𑒰 𑒨𑒟𑒰𑒩𑓂𑒟 𑒁𑒕𑒱। 𑒧𑒳𑒢𑓂𑒢𑒰𑒖𑒲 𑒮𑒢 𑒏𑒞𑒹𑒏𑒼 𑒪𑒼𑒏 𑒏𑒞𑒱𑒂𑒋𑒪 𑒕𑒟𑒱, 𑒣𑓂𑒩𑒞𑒱𑒦𑒰 𑒁𑒕𑒻𑒞 𑒯𑒹𑒩𑒰𑒋𑒪 𑒕𑒟𑒱। 𑒧𑒳𑒠𑒰 𑒑𑒖𑒪𑒏𑒰𑒩 𑒮𑒦𑒙𑒰 𑒠𑒼𑒐 𑒁𑒣𑒢𑒹𑒣𑒩 𑒪𑓄 𑒪𑒻 𑒕𑒟𑒱।
𑒂𑒥 𑒞𑒿 𑒧𑒰𑒿𑒗 𑒂𑓀𑒑𑒢𑒧𑒹 𑒏𑒞𑒱𑒂𑒋𑒪 𑒕𑒲
𑒁𑒣𑒢𑒹 𑒔𑒰𑒪𑒱𑒮𑒿 𑒂𑒥 𑒥𑒹𑒩𑒰 𑒑𑒹𑒪𑒯𑒳𑒿 𑒯𑒧

𑒂 𑒮𑒋𑒯 𑒏𑒰𑒩𑒝 𑒁𑒕𑒱 𑒖𑒹 𑒍 𑒢𑒼𑒩𑒏 𑒮𑒳𑒐 𑒦𑒼𑒑𑓄 𑒪𑒰𑒑𑒻 𑒕𑒟𑒱।
𑒢𑒼𑒩 𑒞𑒿 𑒐𑒮𑒻𑒋 𑒧𑒳𑒠𑒰 𑒧𑒖𑒰 𑒮𑒢 𑒪𑒑𑒻𑒋
𑒏𑒹𑒯𑒢 𑒢𑒲𑒏 𑒣𑓂𑒩𑒹𑒧𑒏 𑒠𑒳𑒐 𑒪𑒹𑒪𑒯𑒳𑒿 𑒯𑒧

𑒥𑒛𑓃𑒏𑒰 𑒐𑒰𑒡𑒱𑒧𑒹 𑒐𑒮𑒻 𑒕𑒟𑒱 𑒂 𑒞𑒯𑒴 𑒪𑒹𑒪 𑒁𑒣𑒢𑒹𑒏𑒹𑒿 𑒠𑒼𑒐𑒲 𑒧𑒰𑒢𑒻 𑒕𑒟𑒱:
𑒕𑒼𑒙𑒏𑒼 𑒚𑒹𑒮𑒮𑒿 𑒢𑒻 𑒮𑒥𑒏 𑒪𑒹𑒪𑒯𑒳𑒿 𑒯𑒧
𑒞𑒿𑒋 𑒥𑒛𑓃𑒏𑒰 𑒐𑒰𑒡𑒱𑒧𑒹 𑒐𑒮𑒱 𑒑𑒹𑒪𑒯𑒳𑒿 𑒯𑒧

𑒞𑒿 𑒏𑒲 𑒑𑒖𑒪𑒏𑒰𑒩 𑒣𑓂𑒩𑒹𑒧𑒏 𑒧𑒯𑒞𑓂𑒫 𑒥𑒱𑒮𑒩𑒱 𑒑𑒹𑒪 𑒕𑒟𑒱, 𑒢𑒻 𑒣𑓂𑒩𑒹𑒧 𑒞𑒿 𑒮𑒦𑒏𑒹𑒿 𑒔𑒰𑒯𑒲।
𑒮𑒦 𑒅𑒧𑒹𑒩 𑒫𑒩𑓂𑒑𑒏𑒹𑒿 𑒣𑓂𑒩𑒹𑒧 𑒔𑒰𑒯𑒲
𑒧𑒩𑒱𑒞𑒼 𑒡𑒩𑒱 𑒏𑒳𑒬𑒪-𑒕𑒹𑒧 𑒔𑒰𑒯𑒲

𑒂 𑒯𑒱𑒢𑒏𑒰 𑒖𑒿 𑒏𑒼𑒮 𑒠𑒴-𑒏𑒼𑒮 𑒧𑒰𑒞𑓂𑒩 𑒔𑒪𑒥𑒰𑒏 𑒩𑒯𑒱𑒞𑒢𑓂𑒯𑒱 𑒞𑒐𑒢 𑒢𑒹, 𑒯𑒱𑒢𑒏𑒰 𑒞𑒿 𑒥𑒯𑒳𑒞 𑒂𑒑𑒰𑒿 𑒥𑒜𑓃𑒥𑒰𑒏 𑒕𑒢𑓂𑒯𑒱 𑒞𑒹𑒿 𑒣𑓂𑒩𑒹𑒧 𑒔𑒰𑒯𑒲।
𑒛𑒰𑒯𑒮𑒿 𑒣𑒯𑒳𑒿𑒔𑒥 𑒏𑒼𑒮-𑒠𑒴 𑒏𑒼𑒮
𑒂𑒑𑒴 𑒥𑒜𑓃𑒥𑒰 𑒪𑒹𑒪 𑒞𑒿 𑒣𑓂𑒩𑒹𑒧 𑒔𑒰𑒯𑒲

𑒂 𑒮𑒹 𑒮𑒦 𑒚𑒰𑒧। 𑒋𑒏𑒙𑒰 𑒯𑒧𑒩 𑒮𑓀𑒑𑒲 𑒕𑒪, 𑒋𑒏𑒙𑒰 𑒣𑒩𑒲𑒏𑓂𑒭𑒰𑒧𑒹 𑒙𑒰𑒣 𑒏𑒹𑒪𑒏 𑒞𑒿 𑒥𑒰𑒖𑒪- 𑒢𑒻 𑒏𑒧𑓂𑒣𑒲𑒙 𑒏𑒩𑒻 𑒕𑒲 𑒞𑒿 𑒢𑒻 𑒏𑒩𑒻 𑒕𑒲, 𑒂 𑒏𑒩𑒻 𑒕𑒲 𑒞𑒿 𑒙𑒰𑒣 𑒏𑒩𑒻 𑒕𑒲। 𑒍 𑒑𑒖𑒪𑒏𑒰𑒩 𑒢𑒻 𑒕𑒪 𑒖𑒿 𑒩𑒯𑒱𑒞𑒋 𑒞𑒿 𑒁𑒯𑒱𑒢𑒰 𑒪𑒱𑒐𑒱𑒞𑒋 𑒖𑒹𑒢𑒰 𑒧𑒳𑒢𑓂𑒢𑒰𑒖𑒲 𑒪𑒱𑒐𑒻 𑒕𑒟𑒱:
𑒥𑒠𑒩𑒲 𑒪𑒰𑒠𑒪 𑒩𑒯𑒻 𑒏𑒼𑒢𑒼 𑒥𑒰𑒞 𑒢𑒻
𑒖𑒠𑒱 𑒥𑒩𑒮𑒲 𑒞𑒿 𑒥𑒩𑒱𑒮𑒰𑒞 𑒥𑒢𑒱 𑒏𑓄

𑒂 𑒢𑒖𑒩𑒱-𑒢𑒖𑒩𑒱𑒏 𑒤𑒹𑒩 𑒂 𑒯𑒰𑒤 𑒑𑓂𑒪𑒰𑒮 𑒤𑒳𑒪, 𑒄 𑒠𑒳𑒢𑒴 𑒙𑒰 𑒁𑒫𑒡𑒰𑒩𑒝𑒰 𑒌 𑒩𑒴𑒣𑒧𑒹 𑒍 𑒩𑒰𑒐𑒻 𑒕𑒟𑒱:
𑒢𑒖𑒩𑒱 𑒅𑒚𑒰 𑒏𑓄 𑒠𑒹𑒐𑒥𑒻 𑒞𑒿 𑒐𑒰𑒪𑒲 𑒥𑒳𑒗𑒰𑒋𑒞 𑒄 𑒠𑒳𑒢𑒱𑒨𑒰𑒿
𑒢𑒖𑒩𑒱 𑒑𑒩𑒰 𑒏𑓄 𑒠𑒹𑒐𑒥𑒻 𑒞𑒿 𑒮𑒦 𑒠𑒹𑒐𑒰𑒋𑒞 𑒄 𑒠𑒳𑒢𑒱𑒨𑒰𑒿

𑒮𑒧𑒰𑒪𑒼𑒔𑒢𑒰 𑒂 𑒫𑒱𑒩𑒼𑒡 𑒠𑒳𑒢𑒴𑒏𑒹𑒿 𑒑𑒖𑒪𑒏𑒰𑒩 𑒢𑒲𑒏 𑒧𑒰𑒢𑒻 𑒕𑒟𑒱।
𑒣𑒏𑓂𑒭𑒡𑒩𑒮𑒿 𑒩𑒰𑒐𑒴 𑒁𑒣𑒢𑒰𑒏𑒹𑒿 𑒥𑒔𑒰 𑒏𑓄
𑒫𑒱𑒣𑒏𑓂𑒭𑒲𑒏 𑒮𑒦 𑒥𑒰𑒞𑒏𑒹𑒿 𑒢𑒻 𑒞𑒲𑒞 𑒥𑒳𑒗𑒴

𑒧𑒯𑒑𑒰𑒃𑒮𑒿 𑒪𑒼𑒏 𑒥𑒹𑒏𑒪 𑒁𑒕𑒱 𑒧𑒳𑒠𑒰 𑒞𑒏𑒩𑒰 𑒪𑒹𑒪 𑒗𑒳𑒧𑒻𑒞 𑒧𑒔𑒰𑒢𑒏 𑒥𑒱𑒧𑓂𑒥 𑒠𑒹𑒐𑒴:
𑒧𑒯𑒑𑒰𑒃𑒮𑒿 𑒐𑒴𑒢𑒹 𑒢𑒻 𑒯𑒛𑓂𑒛𑒱𑒨𑒼 𑒮𑒳𑒐𑒰𑒃𑒋
𑒂𑒥 𑒗𑒳𑒪𑒻𑒞 𑒧𑒔𑒰𑒢 𑒮𑒢 𑒪𑒑𑒻𑒋 𑒪𑒼𑒏

𑒂 𑒄 𑒅𑒪𑒙𑒥𑒰𑒮𑒲 𑒠𑒹𑒐𑒴, 𑒥𑒱𑒧𑓂𑒥 𑒢𑒫, 𑒦𑒰𑒫𑒢𑒰 𑒬𑒰𑒬𑓂𑒫𑒞:
𑒯𑒧 𑒞𑒿 𑒒𑒴𑒩 𑒖𑒛𑓃𑒹𑒪𑒾𑓀 𑒑𑒩𑓂𑒧𑒲 𑒧𑒰𑒮𑒧𑒹
𑒧𑒱𑒗𑒰𑒋𑒪 𑒂𑒑𑒱𑒮𑒿 𑒣𑒮𑒰𑒯𑒲 𑒏𑒯𑒱𑒨𑒼

𑒄 𑒏𑒼𑒢 𑒑𑒼𑒭𑓂𑒚𑒲 𑒕𑒲 𑒖𑒹 𑒁𑒕𑒱 𑒏𑒼𑒢 𑒣𑒞𑓂𑒩𑒱𑒏𑒰𑒏 𑒣𑓂𑒩𑒰𑒨𑒼𑒖𑒱𑒞 𑒔𑒱𑒙𑓂𑒚𑒲 𑒕𑒣𑒥𑒰𑒏 𑒩𑒰𑒖𑒢𑒲𑒞𑒱 𑒮𑒢, 𑒄 𑒩𑒳𑒥𑒰𑒃 𑒠𑒹𑒐𑒴:
𑒧𑒼𑒢 𑒦𑒋 𑒅𑒚𑒪 𑒠𑒳𑒐𑒱𑒞 𑒯𑒼𑒯𑒏𑒰𑒩𑒲𑒮𑒿
𑒅𑒚𑒱 𑒠𑒩𑓂𑒬𑒏 𑒦𑒰𑒑𑒪 𑒧𑒰𑒩𑒰𑒧𑒰𑒩𑒲𑒮𑒿
𑒣𑓂𑒩𑒰𑒨𑒼𑒖𑒏 𑒞𑒿 𑒣𑒟𑒢𑒹 𑒩𑒯𑒪 𑒏𑒰𑒢 𑒁𑒣𑒢
𑒏𑒩𑓂𑒞𑒰 𑒠𑒹𑒐𑒰𑒩 𑒦𑒹𑒪𑒰 𑒖𑒞𑒱𑒨𑒰𑒩𑒲𑒮𑒿

𑒧𑒳𑒠𑒰 𑒥𑒰𑒜𑓃𑒱𑒏 𑒫𑒱𑒭𑒨 𑒖𑒿 𑒧𑒻𑒟𑒱𑒪𑒲 𑒑𑒖𑒪𑒏 𑒁𑓀𑒑 𑒢𑒻 𑒥𑒢𑒋 𑒞𑒿 𑒥𑒳𑒗𑒴 𑒖𑒹 𑒑𑒖𑒪𑒏𑒰𑒩 𑒮𑒧𑒰𑒖𑒮𑒿 𑒏𑒞𑒱𑒂𑒋𑒪 𑒕𑒟𑒱। 𑒧𑒳𑒠𑒰 𑒮𑒹 𑒢𑒻 𑒁𑒕𑒱।
𑒡𑒰𑒩 𑒋𑒐𑒢 𑒡𑒩𑒱 𑒞𑒿 𑒅𑒤𑒰𑒢𑒣𑒩 𑒁𑒕𑒱
𑒪𑒼𑒏 𑒞𑒰𑒏𑒰-𑒞𑒰𑒏𑒲 𑒏𑒩𑒻𑒞 𑒥𑒰𑒢𑓂𑒯𑒣𑒩 𑒁𑒕𑒱

𑒂𑒥 𑒣𑒛𑓃𑒰𑒃𑒢 𑒒𑒙𑒪 𑒁𑒕𑒱, 𑒧𑒱𑒟𑒱𑒪𑒰𑒮𑒿 𑒣𑒛𑓃𑒰𑒃𑒢। 𑒥𑒰𑒯𑒩𑒲 𑒪𑒼𑒏 𑒥𑒱𑒯𑒰𑒩𑒲𑒏𑒹𑒿 𑒧𑒖𑒠𑒴𑒩 𑒂 𑒬𑓂𑒩𑒧𑒱𑒏𑒏 𑒣𑒩𑓂𑒨𑒰𑒨𑒫𑒰𑒔𑒲 𑒧𑒰𑒢𑒱 𑒪𑒹𑒢𑒹 𑒕𑒟𑒱। 𑒞𑒯𑒴𑒣𑒩 𑒑𑒖𑒪𑒏𑒰𑒩𑒏 𑒏𑒪𑒧 𑒔𑒪𑒪 𑒁𑒕𑒱।
𑒥𑒱𑒯𑒰𑒩𑒏 𑒮𑒱𑒩𑒐𑒰𑒩𑒲 𑒥𑒠𑒪𑒱 𑒑𑒹𑒪 𑒮𑒢 𑒪𑒑𑒻𑒋 𑒂𑒥
𑒬𑓂𑒩𑒧𑒱𑒏 𑒒𑒙𑒪𑒰𑒮𑒿 𑒏𑓀𑒣𑒢𑒲-𑒧𑒰𑒪𑒱𑒏 𑒪𑒑𑒻 𑒥𑒱𑒯𑒰𑒩𑒲 𑒖𑒏𑒰𑒿

𑒧𑒳𑒢𑓂𑒢𑒰𑒖𑒲𑒏 𑒑𑒖𑒪 𑒂 𑒩𑒳𑒥𑒰𑒃 𑒮𑓂𑒫𑒔𑓂𑒕𑒢𑓂𑒠 𑒩𑒴𑒣𑒮𑒿 𑒥𑒧𑒏𑒼𑒪𑒰 𑒖𑒹𑒏𑒰𑒿 𑒥𑒯𑒪 𑒁𑒕𑒱। 𑒬𑒹𑒩𑒏 𑒮𑓂𑒫𑒦𑒰𑒫 𑒯𑒼𑒃 𑒕𑒻 𑒖𑒹 𑒖𑒿 𑒍𑒏𑒩𑒰 𑒢𑒲𑒏𑒮𑒿 𑒏𑒯𑒪 𑒖𑒰𑒋 𑒞𑒿 𑒂𑒯-𑒥𑒰𑒯 𑒪𑒼𑒏 𑒏𑒩𑒱𑒞𑒹 𑒁𑒕𑒱। 𑒧𑒻𑒟𑒱𑒪𑒲𑒧𑒹 𑒑𑒖𑒪-𑒩𑒳𑒥𑒰𑒃 𑒖𑒃 𑒞𑒩𑒯𑒹𑒿 𑒣𑓂𑒩𑒮𑒰𑒩𑒱𑒞 𑒦𑓄 𑒩𑒯𑒪 𑒁𑒕𑒱 𑒮𑒹 𑒠𑒹𑒐𑒱 𑒏𑓄 𑒨𑒋𑒯 𑒪𑒰𑒑𑒱 𑒩𑒯𑒪 𑒁𑒕𑒱 𑒖𑒹 𑒖𑒞𑒹𑒏 𑒄 𑒫𑒱𑒡𑒰 𑒁𑒣𑒢𑒰𑒏𑒹𑒿 𑒣𑒮𑒰𑒩𑒱 𑒩𑒯𑒪 𑒁𑒕𑒱 𑒞𑒃𑒮𑒿 𑒥𑒹𑒬𑒲 𑒧𑒻𑒟𑒱𑒪𑒲 𑒪𑒰𑒦𑒰𑒢𑓂𑒫𑒱𑒞 𑒦𑓄 𑒣𑒮𑒩𑒱 𑒩𑒯𑒪 𑒁𑒕𑒱।