गजेन्द्र ठाकुर मुन्नाजीक मैथिली विहनि कथाक संग्रह “प्रतीक”

 𑒑𑒖𑒹𑒢𑓂𑒠𑓂𑒩 𑒚𑒰𑒏𑒳𑒩

𑒧𑒳𑒢𑓂𑒢𑒰𑒖𑒲𑒏 𑒧𑒻𑒟𑒱𑒪𑒲 𑒫𑒱𑒯𑒢𑒱 𑒏𑒟𑒰𑒏 𑒮𑓀𑒑𑓂𑒩𑒯 “𑒣𑓂𑒩𑒞𑒲𑒏”
𑒧𑒳𑒢𑓂𑒢𑒰𑒖𑒲𑒏 𑒧𑒻𑒟𑒱𑒪𑒲 𑒫𑒱𑒯𑒢𑒱 𑒏𑒟𑒰𑒏 𑒮𑓀𑒑𑓂𑒩𑒯 “𑒣𑓂𑒩𑒞𑒲𑒏” 𑒫𑒱𑒯𑒢𑒱 𑒏𑒟𑒰𑒏 𑒣𑓂𑒩𑒞𑒲𑒏𑒰𑒞𑓂𑒧𑒏𑒞𑒰𑒏 𑒣𑓂𑒩𑒞𑒲𑒏 𑒥𑒢𑒱 𑒑𑒹𑒪 𑒁𑒕𑒱। 𑒥𑒱𑒩𑒰𑒩𑒮𑒿 𑒫𑒱𑒯𑒢𑒱 𑒅𑒣𑒰𑒩𑒱 𑒡𑒰𑒢 𑒂 𑒧𑒹𑒩𑒔𑒰𑒃 𑒩𑒼𑒣𑒥𑒰𑒏 𑒣𑓂𑒩𑒏𑓂𑒩𑒱𑒨𑒰 𑒌 𑒮𑓀𑒑𑓂𑒩𑒯𑒏 𑒮𑒦 𑒏𑒟𑒰 𑒮𑒦𑒧𑒹 𑒠𑒹𑒐𑒧𑒰𑒧𑒹 𑒂𑒍𑒞। 𑒞𑒹𑒿 𑒄 𑒕𑒱𑒙𑒳𑒂 𑒢𑒻 𑒩𑒼𑒣𑒳𑒂 𑒡𑒰𑒢𑒏 𑒐𑒹𑒞𑒲 𑒥𑒢𑒱 𑒑𑒹𑒪 𑒁𑒕𑒱। 𑒞𑒲𑒢 𑒧𑒼𑒢𑒏 𑒏𑒙𑓂𑒚𑒰 𑒮𑒦 𑒑𑒼𑒙𑒹 𑒮𑒳𑒢𑒻𑒞 𑒯𑒼𑒋𑒥, 𑒧𑒳𑒠𑒰 𑒋𑒞𑓄 𑒠𑒹𑒐𑒥।
𑒫𑒱𑒯𑒢𑒱 𑒏𑒟𑒰 𑒯𑒰𑒮𑓂𑒨 𑒏𑒝𑒱𑒏𑒰 𑒢𑒻 𑒁𑒕𑒱, 𑒄 𑒏𑒟𑒰𑒏 𑒖𑒛𑓃𑒱 𑒁𑒕𑒱, 𑒥𑒲𑒂 𑒁𑒕𑒱, 𑒕𑒱𑒙𑒳𑒂 𑒡𑒰𑒢𑒮𑒿 𑒦𑒹𑒪 𑒣𑒾𑒡 𑒂 𑒫𑒱𑒯𑒢𑒱𑒮𑒿 𑒦𑒹𑒪 𑒣𑒾𑒡𑒧𑒹 𑒥𑒛𑓂𑒛 𑒁𑒢𑓂𑒞𑒩 𑒕𑒻। 𑒕𑒱𑒙𑒳𑒂 𑒡𑒰𑒢 𑒤𑒾𑒠𑒰𑒃 𑒢𑒻 𑒕𑒻। 𑒮𑒹 𑒯𑒰𑒮𑓂𑒨 𑒏𑒝𑒱𑒏𑒰 𑒥𑒱𑒚𑒳𑒏𑒙𑓂𑒙𑒰 𑒯𑒼𑒃 𑒕𑒻, 𑒌 𑒧𑒹 𑒯𑒿𑒮𑒲 𑒁𑒥𑒻 𑒕𑒻, 𑒧𑒳𑒠𑒰 𑒍 𑒕𑒱𑒙𑒳𑒂 𑒡𑒰𑒢 𑒖𑒹𑒏𑒰𑒿 𑒁𑒕𑒱। 𑒠𑒼𑒮𑒩 𑒥𑒹𑒩 𑒍𑒃 𑒥𑒱𑒚𑒳𑒏𑒙𑓂𑒙𑒰 𑒏𑒟𑒰𑒏𑒹𑒿, 𑒯𑒰𑒮𑓂𑒨 𑒏𑒝𑒱𑒏𑒰𑒏𑒹𑒿 𑒮𑒳𑒢𑒥 𑒞𑒿 𑒢𑒹 𑒯𑒿𑒮𑒱𑒨𑒹 𑒪𑒰𑒑𑒞 𑒂 𑒢𑒯𑒱𑒨𑒹 𑒕𑒑𑒳𑒝𑒞𑒹। 𑒞𑒐𑒢 𑒖𑒿 𑒥𑒱𑒢𑒳 𑒮𑒱𑒗𑒢𑒹 𑒫𑒱𑒯𑒢𑒱 𑒏𑒟𑒰 𑒪𑒱𑒐𑒰𑒋𑒞, 𑒥𑒱𑒢𑒳 𑒮𑒱𑒗𑒹𑒢𑒹 𑒫𑒱𑒯𑒢𑒱 𑒏𑒟𑒰 𑒪𑒱𑒐𑒥 𑒞𑒿 𑒪𑒞𑒲𑒤𑒰 𑒥𑒢𑒥𑒹 𑒙𑒰 𑒏𑒩𑒞। 𑒂 𑒯𑒰𑒮𑓂𑒨 𑒏𑒝𑒱𑒏𑒰 𑒫𑒱𑒯𑒢𑒱, 𑒪𑒒𑒳 𑒂 𑒠𑒲𑒩𑓂𑒒 𑒏𑒟𑒰 𑒫𑒰 𑒅𑒣𑒢𑓂𑒨𑒰𑒮𑒧𑒹 𑒪𑒹𑒐𑒏𑒲𑒨 𑒮𑒰𑒧𑒩𑓂𑒟𑓂𑒨𑒏 𑒁𑒢𑒳𑒮𑒰𑒩 𑒣𑓂𑒩𑒨𑒳𑒏𑓂𑒞 𑒯𑒼𑒃𑒞 𑒩𑒯𑒪 𑒁𑒕𑒱 𑒂 𑒯𑒼𑒃𑒞 𑒩𑒯𑒞।
𑒧𑒳𑒠𑒰 𑒅𑒮𑒢𑒰 𑒡𑒰𑒢𑒮𑒿 𑒥𑒱𑒩𑒰𑒛𑓃𑒧𑒹 𑒫𑒱𑒯𑒢𑒱 𑒢𑒻 𑒥𑒯𑒩𑒰𑒋𑒞। 𑒮𑒹 𑒥𑒱𑒢𑒳 𑒅𑒮𑒲𑒢𑒢𑒹 𑒥𑒲𑒂 𑒥𑒰𑒅𑒑 𑒏𑒩𑓄 𑒣𑒛𑓃𑒞। 𑒥𑒱𑒢𑒳 𑒅𑒮𑒲𑒢𑒢𑒹 𑒮𑒱𑒗𑒰𑒥𑓄 𑒣𑒛𑓃𑒞 𑒂 𑒞𑒃 𑒪𑒹𑒪 𑒥𑒹𑒬𑒲 𑒧𑒹𑒯𑒢𑒞𑒱 𑒏𑒩𑓄 𑒣𑒛𑓃𑒞। 𑒂 𑒥𑒲𑒂 𑒕𑒲𑒙𑒥 𑒞𑒻𑒨𑒼 𑒮𑒦 𑒡𑒰𑒢𑒮𑒿 𑒫𑒱𑒯𑒢𑒱 𑒢𑒻 𑒥𑒯𑒩𑒰𑒋𑒞, 𑒏𑒱𑒕𑒳 𑒮𑒿 𑒢𑒯𑒱𑒨𑒼 𑒥𑒯𑒩𑒰𑒋𑒞। 𑒮𑒹 𑒫𑒱𑒯𑒢𑒱 𑒏𑒟𑒰𑒏𑒹𑒿 𑒮𑒤𑒪 𑒯𑒹𑒥𑒰𑒏 𑒣𑓂𑒩𑒞𑒱𑒬𑒞 𑒏𑒧 𑒕𑒻, 𑒪𑒒𑒳𑒏𑒟𑒰𑒏 𑒮𑒤𑒪𑒞𑒰𑒏 𑒣𑓂𑒩𑒞𑒱𑒬𑒞 𑒏𑒢𑒹 𑒥𑒹𑒬𑒲 𑒕𑒻, 𑒠𑒲𑒩𑓂𑒒-𑒏𑒟𑒰 𑒂 𑒅𑒣𑒢𑓂𑒨𑒰𑒮𑒏 𑒮𑒤𑒪𑒞𑒰𑒏 𑒣𑓂𑒩𑒞𑒱𑒬𑒞 𑒂𑒩 𑒥𑒹𑒬𑒲 𑒕𑒻। 𑒧𑒳𑒠𑒰 𑒅𑒣𑒢𑓂𑒨𑒰𑒮 𑒗𑓀𑒗𑒙𑒱𑒨𑒰 𑒏𑒰𑒖 𑒕𑒻, 𑒧𑒼𑒢 𑒒𑒼𑒩 𑒏𑓄 𑒠𑒻 𑒕𑒻, 𑒥𑒹𑒬𑒲 𑒮𑒧𑒋 𑒪𑒰𑒑𑒻 𑒕𑒻। 𑒫𑒱𑒯𑒢𑒱 𑒏𑒟𑒰 𑒡𑒰𑒿𑒃-𑒡𑒰𑒿𑒃 𑒪𑒱𑒐𑒰𑒃 𑒕𑒻। 𑒧𑒳𑒠𑒰 𑒖𑒯𑒱𑒢𑒰 𑒏𑒫𑒱𑒞𑒰 𑒪𑒹𑒪 𑒂𑒫𑒹𑒑 𑒔𑒰𑒯𑒲 𑒞𑒯𑒱𑒢𑒰 𑒫𑒱𑒯𑒢𑒱 𑒏𑒟𑒰 𑒪𑒹𑒪, 𑒢𑒻 𑒞𑒿 𑒢𑒹 𑒡𑒰𑒿𑒃-𑒡𑒰𑒿𑒃 𑒪𑒱𑒐𑒹𑒥𑒹 𑒏𑒩𑒞 𑒂 𑒣𑒠𑓂𑒨𑒏 𑒑𑒠𑓂𑒨 𑒂 𑒑𑒠𑓂𑒨𑒏 𑒣𑒠𑓂𑒨 𑒥𑒢𑒥𑒰𑒏 𑒂𑒬𑓀𑒏𑒰 𑒮𑒹𑒯𑒼 𑒩𑒯𑒞। 𑒮𑒦 𑒅𑒣𑒢𑓂𑒨𑒰𑒮𑒏𑒰𑒩 𑒏𑒞𑒹𑒏 𑒩𑒰𑒮 𑒫𑒱𑒯𑒢𑒱 𑒅𑒣𑒰𑒛𑓃𑒱 𑒏𑓄 𑒮𑒖𑒥𑒻𑒋। 𑒅𑒣𑒢𑓂𑒨𑒰𑒮 𑒑𑒠𑓂𑒨 𑒕𑒱𑒌 𑒧𑒳𑒠𑒰 𑒍𑒃𑒧𑒹 𑒏𑒼𑒢𑒼 𑒣𑒰𑒞𑓂𑒩 𑒖𑒿 𑒑𑒲𑒞 𑒑𑒰𑒥𑓄 𑒪𑒰𑒑𑒋 𑒞𑒿 𑒍𑒏𑒩𑒰 𑒁𑒯𑒰𑒿 𑒩𑒼𑒏𑒱 𑒠𑒹𑒥𑒻? 𑒖𑒹 𑒅𑒣𑒢𑓂𑒨𑒰𑒮𑒏𑒰𑒩 𑒩𑒯𑒻𑒋 𑒍 𑒫𑒱𑒯𑒢𑒱 𑒠𑒹𑒐𑒱 𑒅𑒣𑒢𑓂𑒨𑒰𑒮𑒏 𑒡𑒢𑒐𑒹𑒞𑒲 𑒠𑒹𑒐𑓄 𑒪𑒑𑒻𑒋, 𑒏𑒐𑒢𑒼 𑒍 𑒫𑒱𑒯𑒢𑒱 𑒏𑒟𑒰 𑒪𑒱𑒐𑒱𑒨𑒼 𑒠𑒻𑒋, 𑒤𑒹𑒩 𑒪𑒼𑒦 𑒮𑓀𑒫𑒩𑒝 𑒢𑒻 𑒦𑒹𑒪𑒰𑒮𑒿 𑒍𑒃 𑒫𑒱𑒯𑒢𑒱𑒏 𑒣𑓂𑒩𑒨𑒼𑒑 𑒅𑒣𑒢𑓂𑒨𑒰𑒮𑒧𑒹, 𑒠𑒲𑒩𑓂𑒒𑒏𑒟𑒰𑒧𑒹, 𑒪𑒒𑒳𑒏𑒟𑒰𑒧𑒹 𑒮𑒹𑒯𑒼 𑒏𑒩𑒻𑒋।
𑒞𑒐𑒢 𑒧𑒳𑒢𑓂𑒢𑒰𑒖𑒲𑒏 𑒫𑒱𑒯𑒢𑒱 𑒏𑒟𑒰𑒏 𑒏𑒲 𑒫𑒱𑒬𑒹𑒭𑒞𑒰। 𑒧𑒳𑒢𑓂𑒢𑒰𑒖𑒲 𑒯𑒧𑒩 𑒣𑒛𑓃𑒼𑒮𑒲 𑒮𑒳𑒩𑒖𑒳 𑒦𑒰𑒃 𑒕𑒟𑒱, 𑒍 𑒥𑒱𑒩𑒰𑒛𑓃𑒧𑒹 𑒖𑒞𑒹𑒏 𑒥𑒲𑒂 𑒪𑒑𑒥𑒻 𑒕𑒟𑒱 𑒍𑒏𑒩 𑒠𑒬𑒼 𑒣𑓂𑒩𑒞𑒱𑒬𑒞 𑒁𑒣𑒢 𑒐𑒹𑒞𑒧𑒹 𑒢𑒻 𑒪𑒑𑒰 𑒣𑒥𑒻 𑒕𑒟𑒱। 𑒥𑒰𑒜𑓃𑒱𑒏 𑒃𑒪𑒰𑒏𑒰 𑒕𑒻 𑒮𑒹 𑒪𑒼𑒏𑒏 𑒐𑒹𑒞 𑒣𑒛𑓃𑒪 𑒩𑒯𑒱 𑒖𑒰𑒃 𑒕𑒻 𑒥𑒱𑒢𑒳 𑒫𑒱𑒯𑒢𑒱𑒏। 𑒮𑒹 𑒮𑒳𑒩𑒖𑒴 𑒦𑒰𑒃𑒏 𑒣𑒛𑓃𑒼𑒮𑒲 𑒍𑒃𑒮𑒿 𑒪𑒰𑒦 𑒅𑒚𑒥𑒻 𑒕𑒟𑒱 𑒏𑒰𑒩𑒝 𑒥𑒰𑒜𑓃𑒱𑒧𑒹 𑒏𑒐𑒢𑒼 𑒏𑒰𑒪 𑒞𑒲𑒢-𑒞𑒲𑒢 𑒥𑒹𑒩 𑒡𑒢𑒩𑒼𑒣𑒢𑒲 𑒯𑒼𑒃 𑒕𑒻, 𑒋𑒏 𑒥𑒹𑒩 𑒩𑒼𑒣𑒴 𑒥𑒰𑒜𑓃𑒱 𑒂𑒋𑒪, 𑒠𑒼𑒮𑒩 𑒥𑒹𑒩 𑒩𑒼𑒣𑒴 𑒤𑒹𑒩 𑒥𑒰𑒜𑓃𑒱 𑒂𑒋𑒪। 𑒂 𑒮𑒳𑒩𑒖𑒴 𑒦𑒰𑒃 𑒕𑒟𑒱 𑒞𑒹𑒿 𑒪𑒼𑒏 𑒫𑒱𑒯𑒢𑒱 𑒪𑒹𑒪 𑒢𑒱𑒬𑓂𑒔𑒱𑒢𑓂𑒞 𑒩𑒯𑒻𑒋।
𑒂 𑒧𑒳𑒢𑓂𑒢𑒰𑒖𑒲𑒏 𑒫𑒱𑒯𑒢𑒱 𑒏𑒟𑒰 𑒮𑒹𑒯𑒼 𑒢𑒱𑒬𑓂𑒔𑒱𑒢𑓂𑒞 𑒏𑒩𑒻𑒋।
“𑒩𑒹𑒫𑒰𑒖” 𑒫𑒱𑒯𑒢𑒱 𑒏𑒟𑒰 𑒪𑒱𑒁। 𑒑𑒰𑒧 𑒒𑒩𑒧𑒹 𑒧𑒮𑒼𑒧𑒰𑒞𑒏𑒹𑒿 𑒪𑒼𑒏 𑒛𑒰𑒃𑒢 𑒏𑒯𑒻 𑒕𑒻 𑒧𑒳𑒠𑒰 𑒧𑒳𑒃𑒪𑒰𑒏 𑒥𑒰𑒠 𑒒𑒩𑒰𑒛𑓃𑒲 𑒪𑒹𑒪 𑒍𑒏𑒩𑒰 𑒂𑒑𑒱 𑒠𑒹𑒥𑒰 𑒪𑒹𑒪 𑒅𑒣𑒩𑒾𑓀𑒗 𑒯𑒼𑒃 𑒕𑒻। 𑒋𑒞𑓄 𑒧𑒳𑒠𑒰 𑒫𑒱𑒯𑒢𑒱 𑒪𑒹𑒪 𑒖𑒹 𑒥𑒲𑒂 𑒕𑒲𑒙𑒪 𑒑𑒹𑒪 𑒕𑒻 𑒮𑒹 𑒏𑒢𑒹 𑒅𑒔𑓂𑒔 𑒮𑓂𑒞𑒩𑒏 𑒕𑒻। 𑒋𑒞𑓄 𑒧𑒵𑒞𑒏𑒏𑒹𑒿 𑒥𑒹𑒙𑒰 𑒢𑒻 𑒕𑒻 𑒧𑒳𑒠𑒰 𑒣𑒞𑓂𑒢𑒲 𑒂 𑒥𑒹𑒙𑒲 𑒕𑒻। 𑒮𑒹 𑒖𑒐𑒢 𑒧𑒵𑒞𑒏𑒏 𑒦𑒰𑒃 𑒏𑒼𑒯𑒰 𑒅𑒚𑒥𑓄 𑒔𑒰𑒯𑒻𑒋 𑒞𑒿 𑒫𑒱𑒡𑒫𑒰 𑒍𑒏𑒩𑒰 𑒩𑒼𑒏𑒻 𑒕𑒻 𑒂 𑒥𑒹𑒙𑒲𑒏𑒹𑒿 𑒏𑒼𑒯𑒰 𑒅𑒚𑒥𑒻𑒪𑒹 𑒏𑒯𑒻 𑒕𑒻। 𑒂 𑒮𑓀𑒑 𑒏𑒹 𑒠𑒹𑒞 𑒌 𑒢𑒫 𑒩𑒹𑒫𑒰𑒖𑒧𑒹, 𑒖𑒹 𑒂𑒃𑒨𑒹𑒮𑒿 𑒣𑓂𑒩𑒰𑒩𑒧𑓂𑒦 𑒦𑒹𑒪 𑒁𑒕𑒱? 𑒞𑒐𑒢 𑒅𑒞𑓂𑒞𑒩𑒼 𑒦𑒹𑒙𑒻𑒋- 𑒢𑒱𑒣𑒳𑒞𑒩𑒰𑒯𑒰 𑒮𑒦।
𑒞𑒯𑒱𑒢𑒰 “𑒏𑒧𑒩𑒳𑒢𑒱𑒮𑒰” 𑒫𑒱𑒯𑒢𑒱 𑒏𑒟𑒰 𑒁𑒕𑒱। 𑒯𑒮𑒲𑒢𑒰 𑒧𑓀𑒖𑒱𑒪 𑒮𑒢 𑒋𑒏𑒙𑒰 𑒂𑒩𑒼 𑒬𑓂𑒩𑒹𑒭𑓂𑒚 𑒅𑒣𑒢𑓂𑒨𑒰𑒮 𑒌 𑒫𑒱𑒯𑒢𑒱 𑒏𑒟𑒰 (𑒮𑒲𑒛 𑒮𑓂𑒙𑒼𑒩𑒲)𑒮𑒿 𑒧𑒳𑒢𑓂𑒢𑒰𑒖𑒲 𑒢𑒻 𑒥𑒢𑒰 𑒮𑒏𑒻 𑒕𑒟𑒱 𑒏𑒲? 𑒏𑒧𑒩𑒳𑒢𑒱𑒮𑒰𑒏 𑒣𑒱𑒞𑒰 𑒩𑒯𑒧𑒰𑒢। 𑒪𑒯𑒚𑒲𑒏 𑒏𑒰𑒖 𑒖𑒹𑒏𑒰𑒿 𑒠𑒧𑓂𑒧𑒰 𑒮𑒹𑒯𑒼 𑒍𑒏𑒩 𑒮𑒦𑒏 𑒣𑒳𑒬𑓂𑒞𑒻𑒢𑒲 𑒫𑒾𑒮𑓂𑒞𑒳 𑒕𑒪𑒻। 𑒏𑒧𑒩𑒳𑒢𑒱𑒮𑒰𑒏 𑒁𑒥𑓂𑒥𑒰-𑒁𑒧𑓂𑒧𑒲𑒏 𑒖𑒰𑒢 𑒄 𑒠𑒧𑓂𑒧𑒰 𑒪𑒹𑒪𑒏𑒻 𑒂 𑒤𑒹𑒩 𑒏𑒧𑒩𑒳𑒢𑒱𑒮𑒰…
“𑒖𑒱𑒨𑒰 𑒖𑒩𑒋 𑒮𑒑𑒩 𑒩𑒰𑒞𑒱”𑒧𑒹 𑒋𑒛𑓂𑒮𑒏 𑒮𑒧𑒮𑓂𑒨𑒰 𑒂 𑒪𑒱𑒫𑒱𑓀𑒑 𑒩𑒱𑒪𑒹𑒬𑒢𑒏 𑒔𑒩𑓂𑒔 𑒁𑒕𑒱 𑒞𑒿 “𑒠𑒱𑒨𑒰𑒠”𑒧𑒹 𑒣𑒢𑒯𑒲𑒏 𑒆𑒣𑒩𑒮𑒿 𑒔𑒱𑒏𑓂𑒏𑒢 𑒔𑒳𑒢𑒧𑒳𑒢 𑒯𑒹𑒥𑒰𑒏 𑒧𑒳𑒠𑒰 𑒢𑒲𑒔𑒰𑒿𑒮𑒿 𑒐𑒪𑒍𑒠𑒰𑒩 𑒏𑒹𑒢𑒹 𑒖𑒹𑒥𑒰𑒏 𑒫𑒱𑒫𑒩𑒝 𑒠𑒹𑒪 𑒑𑒹𑒪 𑒁𑒕𑒱।
“𑒢𑒣𑒢𑒰” 𑒧𑒹 𑒮𑓂𑒞𑓂𑒩𑒲𑒏 𑒏𑒰𑒖𑒏 𑒮𑓂𑒫𑒩𑒴𑒣 𑒞𑒨 𑒏𑒋𑒪 𑒑𑒹𑒪 𑒕𑒻। 𑒁𑒐𑒢𑒼 𑒖𑒢𑒑𑒝𑒢𑒰 𑒏𑒰𑒪𑒧𑒹 𑒮𑒩𑒏𑒰𑒩 𑒮𑓂𑒞𑓂𑒩𑒲𑒏 𑒒𑒩𑒏 𑒏𑒰𑒖𑒏𑒹𑒿 𑒂𑒧𑒠𑒢𑒲𑒧𑒹 𑒢𑒻 𑒖𑒼𑒛𑓃𑒻𑒞 𑒁𑒕𑒱, 𑒂 𑒌 𑒏𑒟𑒰𑒧𑒹 𑒁𑒢𑓂𑒞 𑒯𑒼𑒃𑒋 𑒖𑒐𑒢 𑒋𑒏𑒙𑒰 𑒮𑓂𑒞𑓂𑒩𑒲𑒏 𑒔𑒩𑓂𑒔 𑒁𑒥𑒻𑒋 𑒖𑒹 𑒢𑒼𑒏𑒩𑒲𑒨𑒼 𑒏𑒩𑒻𑒋 𑒂 𑒒𑒩𑒏 𑒏𑒰𑒖𑒼।
“𑒠𑒹𑒯, 𑒧𑒼𑒢 𑒂 𑒣𑓂𑒩𑒹𑒧” 𑒋𑒏𑒙𑒰 𑒯𑒰𑒮𑓂𑒨 𑒏𑒝𑒱𑒏𑒰𑒏𑒹𑒿 𑒏𑒼𑒢𑒰 𑒫𑒱𑒯𑒢𑒱 𑒏𑒟𑒰𑒧𑒹 𑒣𑒩𑒱𑒫𑒩𑓂𑒞𑒱𑒞 𑒏𑒋𑒪 𑒖𑒰𑒋, 𑒞𑒏𑒩 𑒅𑒠𑒰𑒯𑒩𑒝 𑒁𑒕𑒱। 𑒮𑒥𑒲𑒢𑒰 𑒂 𑒧𑒼𑒯𑒮𑒱𑒢 𑒢𑒰𑒧𑓂𑒢𑒰 𑒣𑒰𑒞𑓂𑒩 𑒪𑓄 𑒏𑓄 𑒄 𑒔𑒧𑒞𑓂𑒏𑒰𑒩 𑒧𑒳𑒢𑓂𑒢𑒰𑒖𑒲 𑒏𑒹𑒢𑒹 𑒕𑒟𑒱।
𑒂𑒃 𑒏𑒰𑒪𑓂𑒯𑒱 𑒖𑒐𑒢 𑒪𑒼𑒏𑒏 𑒖𑒱𑒢𑒑𑒲 𑒑𑒞𑒱 𑒣𑒏𑒛𑓃𑒱 𑒪𑒹𑒢𑒹 𑒁𑒕𑒱 𑒞𑒐𑒢 𑒫𑒱𑒯𑒢𑒱 𑒏𑒟𑒰𑒏 𑒧𑒯𑒞𑓂𑒫 𑒥𑒜𑓃𑒱 𑒑𑒹𑒪 𑒁𑒕𑒱। 𑒧𑒳𑒢𑓂𑒢𑒰𑒖𑒲 𑒫𑒱𑒯𑒢𑒱 𑒏𑒟𑒰 𑒪𑒹𑒪 𑒮𑒧𑒩𑓂𑒣𑒱𑒞 𑒕𑒟𑒱 𑒂 𑒄 𑒮𑓀𑒑𑓂𑒩𑒯 𑒯𑒳𑒢𑒏𑒩 𑒌 𑒮𑒧𑒩𑓂𑒣𑒝𑒏 𑒑𑒳𑒝𑒰𑒞𑓂𑒧𑒏 𑒁𑒦𑒱𑒫𑓂𑒨𑒏𑓂𑒞𑒱 𑒕𑒢𑓂𑒯𑒱।